රාහුල මුනිඳුන්ගේ විස්තරය

පින්වතුනි අපේ ඇස් කොච්චර කිලිටි උනාද නරක දේවල් දැකලා. අපේ කතාවල් කොච්චර කිලිටි උනාද නරක දේවල් කියලා. හිත කොච්චර කිලිටි උනාද නරක දේවල් හිතිලා. අපේ ශරීරය කොච්චර කිලිටි උනාද නරක දේවල් කරලා. මේ මුනිවරු ළඟ අපි කවුද. එකයි මන් මේ අයට කියන්නේ නුඹලා මෙහෙ කරන්න. වත කරන්න කියලා. ඔය කිලිටි වෙච්ච හිත් වල කිලිටි හරින්න, ඔය කිලිටි වෙච්ච ඇස් දෙකේ පව් ගෙවන්න. නරක දේවල් කියලා කිලිටි වෙච්ච කටවල් වල පව් ගෙවෙන්න, මේ අතපය වල පව් ගෙවෙන්න මේ රාහුල මුනිඳුගේ සෑයට ගඩොල් අල්ලන්න. මේ මුනිඳුගේ නේත්‍රා දෙකෙන් නරක දේවල් දැකලා නෑ. ඒ හිත නරක දේවල් හිතලා නෑ. සිහිනෙකින්වත් කිලිටි වෙලා නෑ. මේ මුනිඳුගේ නේත්‍රා දෙක කාමයෙන් කිලිටි වෙලා නෑ. ඔය මුව මඩලෙන් කුනුහරුපයක් කියලා නෑ. ඔය හිතින් කාමය ගැන හිතලා නෑ. ඔය මුනිඳුගේ මුළු ජීවිතයම පවිත්‍රයි. දම්ම්බමල්ල පුත්ත මහ රහතන් වහන්සේ දේශනා කරනවා ‘ස්වාමීනි භාග්‍යවතුන් වහන්ස, මෙවුන්දම් සෙවන කියන එක හීනෙන්වත් මං දැකල නෑ’ කියලා. මං අවුරුදු හතෙන් රහත් වුනේ. කොච්චර පවිත්‍ර මුනිවරු වැඩ සිටියද සඟ රුවන තුල. “සංඝං සරණං ගච්චාමි”. ඒ සඟ රුවන මම සරණ යමි.

තමන්ගේ රාගය තමන්ට පෙනෙන්න ඕන. පින්වතුනි මේ මුනිවරුන්ගේ පවිත්‍ර ජීවිතය පෙනෙන්න මහා අත්‍යන්ත බ්‍රහ්මචාරී. අවුරුදු හත වෙනකොට බඹසරට හානියක් වෙනවද?. අවුරුදු හතේදී බඹසරට හානියක් වෙන්නෙ නෑ. අවුරුදු හතෙන් මහන වුනාම එතන ඉඳලම තියෙන්නේ බ්‍රහ්මචාරී ජීවිතේ නම් මේ මුනිඳුන්ගේ මුළු ජීවිතයම බ්‍රහ්මචාරී. අත්‍යන්ත බ්‍රහ්මචාරී. අංශුවකින්වත් කිලිටි නොවිච්ච බඹසරක් අපගේ රාහුල මුනිඳුන්ට තියෙනවා. අපේ මුනිඳුට මල් සෑයක් හැදුවා. ගඩොලින් චෛත්‍යක් හදනවා වගේ තමයි මල් වලින් චෛත්‍යක් හදපු එකත්. ඒ මුනිඳුට සෑයක් හැදුවා. කවදා හරි අපේ හිත විරාගී වුනොත් එදාට අපිට පෙනේවි මේ මුනිඳුන්ට මලක් පුදපු එකත් මෙයට උපකාරයක් උනා කියලා. ලෝකයේ කොතැනක හරි කෙනෙක් බඹසරට ආසයි නම්, කාමය දුරු කරන්න ආසයි නම්, රාගයෙන් කිලිටි වෙච්ච හිත පිරිසිඳු කරගන්න ආසයි නම් ඔයාල රාහුල මුනිඳුන්ගේ සෑය අමතක කරන්න එපා. මේ මුනිඳු බුද්ධ පුත්‍රයෙක්. බෝධිසත්වයෙකුට දාව ඉපදිච්ච පුත්‍රයෙක්. යශෝධරා වගේ පවිත්‍ර අම්මා කෙනෙක්ගෙ රස්නෙට හැදිච්ච පුත්‍රයෙක්. පුදුම සහගතයි. මේ උත්තමය පැවිදි වෙලා හිටියෙ සාරිපුත්ත මහ රහතන් වහන්සේ ළඟ. ලොකු ස්වාමීන් වහන්සේ වගේ මේ යුගයේ පහල වෙච්ච උතුම් කල්‍යාණ මිත්‍රයන් වහන්සේ නමක් ඈතක වැඩ ඉඳලත් අපි මෙහෙම සැනසීමක් ලබනවා නම් සංඝයා අතර අග්‍ර ප්‍රඥාවන්තයන් අතර අග්‍ර සාරිපුත්ත මහරහතන් වහන්සේගේ හෙවනේ ඉන්න කෙනා කොහොම සැනසීමක් ලබයිද. අපේ රාහුල මුනිඳුන්ගේ උපාද්‍යයන් වහන්සේ, ආචාරීන් වහන්සේ මුගලන් මහරහතන් වහන්සේ. ඉර, හඳ අතින් අල්ල්ලන මේ පොලොව අනික් පැත්ත පෙරලන්න පුළුවන් සෘධිමත් මුගලන් ස්වාමීන් වහන්සේ හෙවණේ ඉන්න මෙච්චර පවිත්‍ර රාහුල මුනිඳු කොහොම සැනසිල්ලක් ලබන්න ඇතිද. කාශ්‍යප මහරහතන් වහන්සේ උදේ හවස වඳින, පුදන රාහුල මුනිඳු කොහොම සැනසිල්ලක් ලබන්න ඇත්ද. ආනන්ද මුනිඳුන් බණ කියන හැටි අහගෙන ඉන්න රාහුල මුනිඳු කොහොම සැනසිල්ලක් ලබන්න ඇතිද. මේ රාහුල මුනිඳුන් පින කියන ඒක බුක්ති වින්දා. සැපය කියන ඒක භුක්ති වින්දා හෙවනැල්ලේ ඉඳල. 'සුඛා තේ සමාන ඡායා' බුදුරජාණන්වහන්සෙගේ හෙවනැල්ලේ ඉඳල සැපය විඳපු මුනිවරයෙක්. මේ සුළු පටු රහතන් වහන්සේ නමක් නෙවෙයි. අත්‍යන්ත පාරිශුද්ධ රන්වන් සිරුරක් තියෙන මුනිවරයෙක්. බුදුරජාණන්වහන්සෙත් එක්ක පිටිපස්සෙන් වඩින කොට දෙවිවරු මල් ඉහිනව කියනවා. වැඳගත්තු ගමන් කියනවා. කඳුළු සලනවා කියනවා. බුද්ධ පුත්‍රයන් වහන්සේ බුදු පියාණන් පිටුපසින් වඩින කොට.

රාහුල මහ සෑය හදන්න එකතුවෙන්නේ මේ ලෝකයේ කොතැනක හරි ඉඳල මම කියන්නේ සිල් රකින්න ආසයි. ශික්ෂාකාමී බව කියලා කියන්නේ සිල් රකින්න ගොඩක් ආසයි. ඒ නිසා හැමවෙලාවෙම විමසනවා මේකෙන් මගේ සීලයට හානියක් වෙයිද නැද්ද කියලා. ඒ විදිහට සිල් රැකපු කෙනෙක් මේ බුද්ධ සාසනයේ වෙන නෑ. ඒකයි ශික්ෂාකාමී කියන්නෙ. ඒ කියන්නෙ හික්මීමට කැමතියි. ගොඩක් තමන් දමනය වෙන්න කැමතියි. අපිට දමනය වෙන්න බැරි වෙලා. සිල් පද ගැන දැන දැනත් සිල් පද ඉක්මවා යනවා. අපිට අපිවම පාලනය කරගන්න බැරි වෙලා. අපි මේ රාහුල මුනිඳුන් ළඟ දූවිල්ලක් වගේ වැතිරිලා පින් කරගන්න ඕන. මේ සුළු පටු මුනිවරයෙක් නෙවෙයි. බුදුරජාණන් වහන්සේගෙන් ඇහුව ස්වාමීනි මට පිරිනිවන් පාන්න කාලයයි. තාත්ත කෙනෙක්ගෙන් පිරිනිවන් පාන්න පුතෙක් අහනවා. බලන්න විරාගී බව. රාහුල ඔබ කොහෙද පිරිනිවන් පාන්නෙ. ස්වාමීනි දෙවියන් ගොඩාක් ඉල්ලා හිටිනව දිව්‍යලෝකේ පිරිනිවන් පාන්න කියලා.

මේ රහතන් වහන්සේගේ ජීවිතේ ආශ්චර්ය තමයි මනුස්සයෙකුට දෙවියන් අතර මැරෙන්න බෑ. ඒ කියන්නේ මනුස්සයෙකුට දිව්‍යලෝකේ අවසන් හුස්ම හෙලන්න බෑ. මනුස්සයෙකුට මේ සරීරයෙන් දිව්‍ය ලෝකේ ගිය හැකියි. ඒත් අවසන් හුස්ම හෙලන්න මනුස්ස ලෝකෙට එන්න ඕන. මහා මන්ධාතු රජ්ජුරුවෝ ආදී රජ්ජුරුවෝ පවා දිව්‍යලෝක වල ඉඳල මැරෙන්න මනුස්ස ලෝකෙට ආව. ඒ ලෝක ධර්මතාවය වෙනස් උනා. මේ මහ රහතන් වහන්සේ දෙව් විමනේ දෙවියන් හඬද්දී, වැලපෙද්දී රන් කඳක් සේ විමනේ සැතපිලා එහෙමම පිරිනිවන් පෑවා. විමනෙන් විමන කම්පා වෙලා පෘතුවිය තෙක් සෙලවී ගියා. ඒ ශ්‍රී දේහය ඉබේම දැවී ගිහින් ශ්‍රීමත් කොඳමල් පැහැයෙන් ධාතු ඉතුරු උනා. දෙව් විමනේ අපගේ මහා රාහුල මුනිඳුන්ට සුපහන් සිත් ඇති ඒ පිහිට ලබපු දෙවිවරු දිවි දෙවැනි කොට ආරක්ෂා කරනමින් වඳිනවා දෙව් විමනේ රාහුල මුනිඳුන්ගේ ධාතුන් වහන්සේලාට. ඉතින් මනුස්ස ලෝකේ අපිත් ඒ උතුම් ශ්‍රී නාමයට ඇල්පිටිය මහමෙව්නා භාවනා අසපුවේ අද මුල් ගල තිබ්බ. සොඳුරු වෙහෙරක් හැදේවි. දෙවියන්ටත් පින් කරගන්න අවස්තාවක්. දෙවි වරුන්ටත් ධාතූන් වහන්සේලා ලබා දෙන්න අවස්තාවක්. මේ වෙහෙරට දරදිය අදින්න අවස්තාවක්. නාගයන්, යකුන්, රකුසන් ආදී අමනුශ්‍යන්ට පවා පින් කරගන්න අවස්තාවක්.

නාග ලෝකේ දී තමයි මේ මුනිඳුන් පලවෙනි විවරණ ගත්තේ. ඒ නිසා නාග ලෝකේ අයටත් නාග ලෝකෙන් අත්මිදෙන්න සුදුසු අවස්තාවක් මේ මුනිවරයාගේ සෑයට මෙහෙ කිරීම. දෙවියන්ට, මිනිසුන්ට කාටත් ශික්ෂා කාමී බව පිණිස, ඉවසීම පිණිස, අවවාදක්ෂම පිණිස, ධරාගනීම පිණිස, ලද සිව්පසයෙන් සතුටු වීම පිණිස මුනිවරුන්ගේ සෙවනේ සැනසීම පිණිස, බුදුරජාණන් වහන්සේගේ සෙවනේ සැනසිල්ල ලැබීම පිණිස උපකාරී වන පිනක් මේ වෙහෙර තැනීම.

ඒ නිසා අද මෙතක් වෙලා ධර්මය අහපු පින, රාහුල මුනිඳුගේ ජීවිත කතාව ඇසූ පින, මලින් මේ සෑ රජුන් නිර්මාණය කරපු පින, මල් සෑයක් සැදුව පින, සොඳුරු රාහුල මුනිදුන්ගේ සිතුවමක් ඇඳපු පින. (ඇත්තටම මේ සිතුවම වගේ කෝටි ගුණයක් ලස්සනයි ඇත්තම රාහුල ස්වාමීන් වහන්සේ). රාහුල මුනිඳුන් ගැන සුපහන් සිත් ඇති දෙවිවරු, තම විමනේ රාහුල මුනිඳුන්ගේ ධාතු වලට වඳින දෙවිවරු, මිනිස්සු ගැන අනුකම්පාවෙන් රාහුල මුනිඳුට වැඳලා පින් කරගන්න මේ මිනිස්සු ගැන අනුකම්පා කරන්න, දයාව ඇති කරගන්න, දේව ගතියෙන් ඔබ වහන්සේලා බැබලෙන්න, මේ උතුම් සෑයට දෙවි වරුන්ගෙන් රාහුල මුනිඳුන්ගේ ධාතුන් වහන්සේලා ලැබේවා. දෙව් විමනේ පිදුම් ලැබූ මේ ධාතුන් මේ සෑයේ නිදන් වේවා.

ඉතින් ඒ සියලු දෙවියන්ට, සියලු බ්‍රහ්ම රාජයන්ට මේ පින අනුමෝදන් වේවා. ඒ වගේම තුසිත තව්තිසා වැසි දෙවිවරුන්ට, පිනැති සක් දෙවිඳුන්ට, ඒ වගේම විශේෂයෙන් දුටුගැමුණු දිව්‍යරාජයා, සද්ධාතිස්ස දිව්‍යරාජයා, නන්දිමිත්‍ර, වේළුසුමන ආදී දෙවි වරුන් ඒ වගේම තිස්තුන් කෝටියක් දෙවිවරුන්, චන්දිම දිව්‍යපුත්‍රයා ඇතුළු දෙවිවරු රාහුල මුනිඳු කෙරේ පහන් සිත් ඇති දෙවිවරු, ධාතුන් වහන්සේලා වඳින පුදන දෙවිවරු, විස්කම් දිව්‍ය පුත්‍රයා, ඒ වගේම දතරාෂ්ඨ, විරුඩ, විරූපාක්ෂ, වෛශ්‍රවණ කියන සතරවරම් දෙවිවරු ආලවක සෙන්පතිඳුන්, සීවක සෙන්පතිඳුන් ඇතුළු දෙවිවරු, ඒ වගේම සුමන සමන් දෙවියන්, ශ්‍රී කතරගම කන්ධ කුමාර දෙවියන්, ශ්‍රී විෂ්ණු මහා දෙවියන්, දැඩිමුණ්ඩ, අයියනායක, ගම්බාර, පත්තිනි දෙවියන්, නා ලොව නා පිරිස, ගස් ගල් වන පර්වත ජාල තටාක භූමි ආශ්‍රිත දෙවි දේවතාවෝ සියලු දෙනා මේ පින් අනුමෝදන් වේවා. රාහුල මුනිඳුට වෙහෙරක් කරන්න එකතු වේවා. සැපයට පත් වේවා. බුදු සසුනත් මේ සියලු දෙනාත් ආරක්ෂා කරත්වා.

තෙරුවන් සරණයි 🙏

Read More