4 - අන්තිමයා වීම අගනේය

  මහ රහතුන් වැඩි මග ඔස්සේ - අතහැරීම පොත 1

        මේ ආත්මභාවයෙදීම නිවන් අවබෝධකර ගැනීමේ අදිෂ්ඨානය ජයගැනීමට වීර්යයෙන් පෙරට යන භික්ෂුවට ‘වත’ යනු කප්රුකකි. වත යනුවෙන් හඳුන්වන්නේ ආරණ්‍ය තෘෂ්ණාවෙන් ‘ආරණ්‍ය මගේ, මම ආරණ්‍යයේ’ යන මමත්වයෙන් කුටි හදන, කාණු කපන, ගොඩනැගිලි තනන, මල් වවන ආදී දේවල් නොවේ. භික්ෂුව ප්‍රතිපත්තිගරුක නම් එම කටයුතු දායකයින් විසින් සපුරා දෙනු ඇත. එසේ නොවන්නේ නම් භික්ෂුවගේ යුතුකම, ලද දෙයින් සතුටුවීම සහ ගිහි පිංවතුන් යුතුකම් මගහරින්නේ නම්, එයද කමටහනක් ලෝක ස්වභාවයක් යයි ගෙන ලෝකයෙන් මිදී යාමය. භික්ෂුවට උපරිම මට්ටමෙන් යැපීමට තුන් සිවුරත්, පාත්‍රයත්, කුටි පහසුකමත් පමණි. නිවන් මගේ සීමාවද මේ අවමය තුල ගොනුවී පවතී. භාව මගේ සීමාව මීට වඩා විසාල වශයෙන් පුළුල්ය.

තමා විසින් කළ යුතු වත් රාශියක් ආරණ්‍ය තුළ ඇත. මිදුල ඇමදීම, කුටි පිරිසිඳු කිරීම, දාන ශාලාවේ ක්‍රියාකාරකම්, රෝගී භික්ෂූන්ට උපස්ථාන කිරීම, බුදු මැදුරේ පුජා කටයුතු, වැඩිහිටි භික්ෂූන්ට, ආගන්තුක භික්ෂූන්ට උපස්ථාන කිරීම යන මේවා භික්ෂුව අනිවාර්යයෙන්ම කළ යුතුය. ආරණ්‍යයේ පැවැත්මත්, පිරිසිඳු භාවයත්, තමා තුළ මාන්නය වැනි කෙලෙස් දුරුකර ගැනීමටත්, වත අතිශයින්ම උපකාර වේ. මාන්නය, අහංකාරකම, උඩඟු බව ඇති කිසිවෙකුට භාවනාවෙන් ප්‍රතිඵල ලැබිය නොහැක. එවැනි අය මග වැඩු කල්‍යාණ මිත්‍රයෙකු, ගුරුවරයෙකු දෙන නිවැරදි උපදේශයන්ට වඩා ඉහලින් යාමටත්, නිතරම තමා ගුරුවරයා වීමටත් සිතනු ඇත. අනුන්ට සවන් දීමට කැමති නොවනු ඇත. ගමනේදී උස්, පහත්, දුප්පත් පොහොසත්, ලොකු කුඩා ඕනෑම දෙයක  යමක් ඉගෙනීමට ඇත්නම් එය ඉගෙන ගැනීමට අප දක්ෂ විය යුතුය. මාන්නය ඇති තැනැත්තාට එය කළ නොහැකිය. මේ සියල්ලටම බෙහෙත වතය.

ඔබ වැසිකිළිය පිරිසිඳු කරන විට ඔබ පිරිසිඳු කරන්නේ වැසිකිළිය බව නොසිතිය යුතුය. ඔබ සිතිය යුත්තේ ඔබ පිරිසිඳු කරන්නේ ඔබගේ සිත බවයි. ඔබ මිදුල අමදිද්දී ඔබ මිදුල අමදින බව නොසිතිය යුතුයි. ඔබ සිතිය යුත්තේ ඔබ අමදින්නේ ඔබ සිතේ ඇති කුණු බවයි. නිවන් මගට සිත පිරිසිඳු කරගත යුත්තේ මෙසේය. මාරයාගේ ස්වභාවය ඔබට ලකුණු සහ හොඳ නම ලබා දීමට ඔබව පෙලඹවීමය. ඔබ ලකුණු දිය යුත්තේ මාරයාට නොව, ඔබගේ නිවන් මගටය.

ඔබ සිතිය යුත්තේ වැසිකිළිය කිසිවෙකු විසින් නොසෝදා ඇත්තේ, මිදුල කිසිවෙකු විසින් ඇමැද නැත්තේ ඔබේම යහපත සඳහා බවයි. ඔබ ඒ අවස්ථාවෙන් උපරිම ප්‍රයෝජන ගතයුතුය. මෙවැනි වත ඔබ මග හරින විට, ඔබේ සිත කුණු, අසූචි වලින් ඔබේ සිත දිනපතා කෙලෙස් වලින් පිරෙන බව වටහා ගත යුතුය. කුණු වලින් පිරුණු සිත මාරයාට හොඳ තෝතැන්නකි. සැමවිටම ස්ථානයේ සිටින පඩික්කම් සෝදන භික්ෂුව වීමට ඔබ මැලි නොවිය යුතුය.

නිවන් මගේ හික්මෙන භික්ෂුව සෑම විටම නිහතමානීකමේ උපරිම ස්ථානයක සිටිය යුතුය. කෙනෙක් ඔබගේ හිසට අත සේදුවද, එය ඔහුගේ ස්වභාවය යයි සිතා, ඔබ ඔබගේ ස්වභාවය තුළ නොගැටී සිටිය යුතුය. ඔබ හැමෝටම පසුපසින් සිටීමටත්, දහසක් දේ ඔබ දන්නවා වුවද කිසිත් නොදන්නෙක් සේ පිරිස ඉදිරියේ හැසිරීමත් කළ යුතුය.

LABEL: මහ රහතුන් වැඩි මග ඔස්සේ