මහ රහතුන් වැඩි මග ඔස්සේ - අතහැරීම පොත 1
ඔබ තවම මග වැඩීමට සුදානම් වන භික්ෂුවක් පමණි. ඔබ විවේකීව සිටින්න. දිනකට මෙච්චර වෙලාවක් භාවනා කළ යුතුයි, රාත්‍රී නිදිවරා භාවනා කළ යුතුයි යන සිතිවිලි අනිත්‍ය වශයෙන් දැක අයින් කරන්න. ඔබ අධිෂ්ඨානයක් ඇතිකර ගන්න. මා ප්‍රාර්ථනා කරන්නේ, වීර්ය වඩන්නේ මාගේ අවසන් හුස්ම මේ කයෙන් පිටවන මොහොතේ කිසිම ඇලීමක්, බැඳීමක්, ගැටීමක් නැතිව පිටකිරීමට පමණක් බව සිහිකරන්න. මොන හේතුව නිසාවත් සෝවාන්, සකෘදාගාමි, අනාගාමි, අරිහත් මාර්ග ඵල ගැන නොසිතන්න. මාර්ග ඵල වලට ඇති ආශාව අතහරින්න. මාර්ග ඵල තන්හාවෙන් අනාගාමි වීමට ගියහොත් ඔබේ වටිනා ජීවිතය අනාගන්නා බව සිතන්න. විවේකීව සිතන්න. නිදිමතම නම් පමණක් නිදාගන්න. සරලව, පහසුව, නිදහස්ව සිටින්න. ඔබේ මේ ආකාරයේ ප්‍රතිපදාවක යෙදෙන බව කිසිවෙකුට නොඅඟවන්න. ඉන්ද්‍රියන් හයට පස්සය වන සෑම රූපයක්ම අනිත්‍ය වශයෙන් දකිමින්, සිතත්, කයත්, පරිසරයත් සමග නොගැටී සිටින්න. ඔබ නිරතුරුවම සිතන්න, ඔබ මේ සටන් කරන්නේ මාරයා සමග බව. ඔබට අවශ්‍ය සෑම වෙලාවකම මාරයාව රවට්ටන්න. බිය ගන්වන්න, තැති ගන්වන්න. ඔබට මුලින් කීවේ අරිහත් උතුමන් සමග මනසින් ජීවත් වන්නටය කියල. ඒ මාරයා රැවටීම පිණිස කරන දේවල්ය. දැන් ඔබ මාරයාව තැති ගන්වන්න. ලෝක ධාතුවේ හැමදෙයක්ම අනිත්‍ය ඔබ මනසින් දැක මාරයාව කම්පා කරවන්න. දැන් ඔබේ රාජකාරිය මෙය විය යුතුය. සාරාසංඛ කල්ප ලක්ෂ ගණනාවක සිට සතර අපායට, මනුෂ්‍ය, දිවය ලෝකවලට ගාල කරමින්ද, ඔබ කෙරෙහි ආධිපත්‍ය පැතිරූ මාරයාට ටික ටික රිදවන්න. බොක්සිං තරඟයකදී ප්‍රතිමල්ලවයාට සෙමෙන් සෙමෙන් පහර දෙමින්ද, ඔහුගෙන් උපක්‍රමශීලීව පහර කමින්ද ප්‍රතිමල්ලවයාව හෙම්බත් කොට අවසාන මැරු පහර කිහිපයකින් ඔහුව බිම දමන්නා සේ, ඔබද මාරයාව උපක්‍රමශීලීව රවටන්න. ඔබේ ඉන්ද්‍රියන්ට ගෝචරවන සෑම රුපයක්ම අනිත්‍ය වශයෙන් දකින්න. දකින රූප මග හරින්න්න එපා. රූප බලෙන් සොයන්න යන්නත් එපා. ඔබ වේගවත් නොවන්න. මන්දගාමීද නොවන්න. ඔබේ ස්වභාවය තුළම ඔබ කටයුතු කරන්න. ‘දැන් මොන මාර්ගඵලයකද ඉන්නේ, තව කොච්චර කළ යයිද?, මට පුළුවන් වෙයිද?... මේ සිත් ඇතිවන මොහොතේම අනිත්‍ය වශයෙන් දැක පරාජය කරන්න. ගැටෙන්න එපා. රූපයක් දුටු සැනින් අනිත්‍ය වශයෙන් දකින්න. නැවත නැවත එම රූපයට ඇලීමක් ඔබ තුළ ඇති වන්නේ නම් එම රූපය විනිවිද දකින්න උත්සහ ගන්න. එහෙම කලොත් ඔබේ ප්‍රතිඵලය ඉක්මන් වේවි. අදාළ රූපය සුරූපී කාන්තා රුවක් කියා සිතන්න. ඔබ ඇය මව් කුසේ සිටිනවා දකින්න. ඉස්ගෙඩියෙක් ලෙසින් පටන් ගෙන, නවා මාසයක් බැලුම් බෝලයක් වැනි මව් කුසේ විඳි අනන්ත වේදනා, මරලතෝනි දීගෙන ලෝකයට බිහිවන හැටි, මළ මුත්‍ර ගොඩේ දඟලන වයස....
ළමා, තරුණ, මධ්‍යම, මහරු වශයෙන් එම රූපය දකින්න. ඔබ දූටු ලස්සන
රූපය ඇටසැකිල්ලක් කර දකින්න. එම ඇටසැකිල්ලේ බඩවැල්, නහර, මස් එල්ලාගෙන
සිටිනා ස්වභාවය දකින්න. ඔහුගේ හෝ අයගෙ රූපය මනසින් නිරුවත් කොට සම්, නහර විනිවිද ගොස්, සම නමැති උරයට පුරවා ඇති
ජරාගොඩ දකින්න. ලස්සන තිබුනේ ඔහු හෝ ඇය තුළ නොව, තමාගේ අවිද්‍යාවෙන් පිරුණු අනිත්‍යවන
සිත තුළ බව සිහිනුවණින් දකින්න. පංච උපාදානස්කන්ධය, සප්ත බෝජ්ජංග, පටිච්ච සමුප්පාදය, සතර සතිපට්ඨාන ධර්මතාවයන් ගිරවුන් මෙන් කටපාඩම්
කරන දේවල් නොව, රුපයේ අනිත්‍ය බව දකිමින්, ප්‍රඥාවෙන් ත්‍රිව්ර වන විට ඔබ ලබන අවබෝධය තුළ
නොදැනුවත්වම ඔබට වැඩෙන්නේ ඉහත ධර්මතාවයන් බව සිතන්න. ඔබ තවම සිටින්නේ පුහුණු මට්ටමකය. තවම තරඟය පටන්
ගත්තේ නැත. තවම ඔබ තරඟයට මුහුණදීමට ඇඟ උණුසුම් කරනවාය. ශක්තිමත්ව උණුසුම් වන තරමට
තරඟයට ජවය ලැබේ. මෙය මුළු ලෝක ධාතුව තුළම ආධිපත්‍ය පතුරුවාගෙන සිටිනා මාරයාට
එරෙහිව කරනා සටනකි. තරඟයකි. තරඟයෙන් ඔබ දිනුවොත්, ඔබ ලෝකයෙන් එතෙරට යන කෙනෙක්ය. ඔබ
මේ යෙදී සිටින්නේ ලොව්තුරා බුදුරජාණන් වහන්සේලා, පසේබුදුරජාණන් වහන්සේලා, අරිහත්
උතුමන්, උතුමාවියන් තරඟ කොට ජයගත් තරඟයකටය. මේ තරඟයෙන්
රාහුල, සෝපාක, නීග්‍රෝධ වැනි
දරුවන්ද ජය ගෙන ඇත. පටාචාරා, ඉසිදාසි වැනි කාන්තාවන්ද ජය ගෙන ඇත. පුහුණුව සාර්ථක
නම් ජයග්‍රහණය ස්ථිරය.
ඔබ සරල වන්න. සැහැල්ලු වන්න. නිදහස්ව සිටින්න.
අවශ්‍ය වෙලාවේදී පැන් පහසු වන්න. පොරවන සිවුර දහදිය ගඳ නම් සෝදෑ ගන්න. කුටිය,
මිදුල පිරිසිඳුව තබා ගන්න. අනිත්‍ය දකිනවා කියා අපිරිසිඳුකම ලඟට නොගන්න. අනිත්‍ය
දකිනවා කියා ඔබ අපිරිසිඳුකම ලඟට ගන්නේ නම් ඔබ දකින්නේ මුස්පේන්තු අනිත්‍යකි. එය
මාර බලයකි. ඔබ එය පරාජය කරන්න. ඔබ මධ්‍යස්ථ වන්න. අසුභය දැකීමට නම් සාපේක්ෂව ලස්සන
හා පිරිසිඳුව තිබිය යුතුය. ඒ ලස්සනට නොඇලීමට, ලස්සන ඔබේ කර නොගැනීමට ඔබ ශක්තිමත්
විය යුතුය. මේ ලෝකයේ සියලුම ලස්සන රූප ඔබගේ කමටහන් විය යුතුය. හින්දි සිනමාවේ
සුරූපීම නිළියත් වැඳිරියක්, ඇටසැකිල්ලක් සේ
දැකීමට ඔබට හැකිවිය යුතුය. ඒ අවස්ථාව ඔබට ලැබුණේ ඇය සුරූපී වූ නිසාය. ලස්සන නොමැති
ලොවක ඔබට අසුභය වැඩිය නොහැක. අවලස්සන බවට යමක් පවතින්නේ ලස්සන තිබුන හොත්ය. මන්ද
ලස්සන අනිත්‍ය වී අවලස්සන ඇතිවන බැවිනි. මේවා ලෝකයේ ස්වභාවයන්ය.
ඔබ මෙසේ අවංකව, වීර්යවන්තව ප්‍රතිපදාවේ යෙදී සිටිනා විට ලොව්ව්තුරා
බුදුරජාණන් වහන්සේ ඔබගේ හදවතට වඩීවි. මොකද දැන් ඔබේ හදවත සැබෑ බුදු කුටියක් නිසා.
උන්වහන්සේ ඔබට කියා දෙනු ඇත. ඊළඟට ගතයුතු මග සංඥා වශයෙන් ඔබට වැටහෙනු ඇත. මෙවිට ඔබ
සද්ධන්ත හස්තිරාජයකු සේ වීර්යයෙන් නැගී සිටීවි. ඇයි දන්නවද? ඔබට ප්‍රත්‍යක්ෂ
වශයෙන් වැටහෙනවා ලොව්තුරා බුදුරජාණන් වහන්සේ ඔබ ළඟ වැඩසිටින බව. ඔබට කමටහනක් දෙන
බව වැටහේවි. නිවන් මග වඩන්න! බුදු සමිඳුන් දකින්න!
මේ විශ්වාසය තුළ ජයග්‍රහණයේ දොරටුව ඇත. ඔබගේ
උත්සාහයෙන් එය විවෘත කර ගන්න. ඔබ දොරටුව විවෘතකර ගතහොත් ලෝකය තුළ ඔබ නිවෙනු ඇත.
එවිට දෑස් පියාගත් සැනින් මුළු ලෝකයම නිරුද්ධ කර දැකීමට ඔබට හැකිය. එයට ඔබ
ශක්තිමත් වනතුරු කලබල නොවන්න. තවමත් ඔබට උන්වහන්සේගේ මග පෙන්වීම අවශ්‍යය. එතෙක් ඔබ
බුදුරජාණන් වහන්සේ මනසින් ඔබේ ආරක්ෂකයා වශයෙන් වඩම්මවා ගන්න දක්ෂ වන්න.
0 comments:
Post a Comment