මේ ජීවිතය තුළදීම නිවීම සාක්ෂාත් කිරීම සඳහා
වෙහෙසෙන භික්ෂුවකට නිදහස් පරිසරයක් අවශ්‍යමය. නිදහසට එක් අර්ථයක් දිය නොහැක.
ලෞකික, ලෝකෝත්තර උවමනාවන්ට අනුව නිදහසේ අර්ථය වෙනස් වෙයි. කෙනෙක් විශ්ව විද්‍යාල
අධ්‍යාපනය, ගුරු පත්වීම, රජයේ රැකියාව, දේශපාලන... නිදහස ලෙස දකියි. මේ කිසිත්
වරදක් නොවේ. ඒ තම තමන්ගේ දෘෂ්ඨීන්ටය. එහෙත් ඒ ලොව්තුරා නිර්වාණ ප්‍රතිපධාවේ කියවෙන
නිදහස නම් නොවේ. මෙහි සඳහන් කරුණු අදාළ වන්නේ ශාසනයේ හික්මෙන ළමා තරුණ භික්ෂූන්
වහන්සේලාට නොව, ජීවිත අවබෝධයෙන් ලෞකික සම්පත් දුක බව දැක, මේ සියල්ල තුලින්
රැස්වන්නේ දුකම බව දැක, ගිහි බැමි වලින් වචනයේ පරිසමාප්ත අර්ථයෙන්ම මිදී මේ
ජීවිතයේදීම නිවීම සාක්ෂාත් කරගැනීමට ප්‍රතිපදාවේ යෙදෙන වීර්යවත්යන්ටය. මෙවැනි
සත්පුරුෂයන් විශාල පිරිසක් ශාසනය තුළ සිටින බව සත්‍යයකි. ඒ මග යන්නට ඔබ රුචි නම්
ඔබටද මග විවෘතය. ලොව්තුරා බුදුරජාණන් වහන්සේ ඔබට නිවැරදි මග කියාදී ඇත. නිදහස
අර්ථවත් වීමට ඔබ මෙසේ සිතිය යුතුය. ‘මා පැවිදි වූයේ අනුන්ට බණ කීමට, පිරිත් කීමට,
පන්සල් ආරණ්‍ය පාලනය කිරීමට, නායක හිමිනමකගේ
මීළඟ උරුමක්කාරයා වීමට හෝ දිව්‍ය, භ්‍රක්ම සංඥා වැඩීමට නොව, මේ ආත්මභාවය තුළදීම නිවන් මග සම්පුර්ණ
කරගැනීමට බව සිතීමට ඔබට ශක්තිය තිබිය යුතුය. ලොව්තුරා බුදු වදනට අනුව නිදහස යනු
මෙසේ සිතන්නට හැකි වීමයි. මාරයාගේ ධර්මයට අනුව නිදහස යනු මීට ප්‍රතිවිරුද්ධව
සිතීමයි. බුදු පුතෙකු ලෙස පළමුවෙන්ම, ඔබගේ නිවීම ඇත්තේ බුදුරජාණන් වහන්සේ ළඟවත්, නායක ස්වාමීන් වහන්සේ ළඟවත්, පිරිත් පොතේ හෝ ත්‍රිපිටකයේ නොව තමා තුළම බව
සිතිය යුතුය. ඉහත කිසිවක් තුළ නිවීම නොමැත. දැනුම, ආදර්ශ, මාර්ගය ඉහත කරුණු කාරණා තුළ ඇත. ඒ ගැන තර්කයක්
නොමැත. ඔබ ධර්මය ඉගෙනීමට පොතපතටම පමණක් යොමු වුවහොත් ඊළඟට සිදුවන්නේ දැනුමේ
පණ්ඩිතභාවය වැඩිවී ධර්ම දේශනා, ධර්ම සාකච්ඡා පැවැත්වීමට
යාමය. එසේ නැතිනම් මිහිරි ස්වරයෙන් බුදු මැදුරට, බෝ මළුවට කොටුවී පුජාවන්
පැවැත්වීමටය. ගිහිදායකයන් මේවාට ඉතා ප්‍රියය. භික්ෂූන් වහන්සේටද ලැබෙන ලකුණු, ජනප්‍රිය භාවය හා සැලකිලි ඉහළය. දෙපාර්ශවයන්ටම
වැඩෙන්නේ කෙලෙස් ධර්මයන්ය. ඒවා සංසාරික සැප පිණිස හේතුවේ. අවසානයේ සියලු දේ අතහැර
පැවිදිවූ හාමුදුරුවෝ දායක පිංවතුන් සතුටු කරන රූකඩයකි.
මෙහිදී ඔබ සියල්ල අත හැරීමට ඔබ දක්ෂ විය යුතුය.
හැබැයි ඔබට වඩා දක්ෂ, මාර්ගය වැඩු, කල්‍යාණ මිත්‍රයෙක් ඔබ ආශ්‍රය කළ යුතුය. ඔබ
ශක්තිමත් තැනකට එන තුරාවට ඔබ එය අතහරින්න එපා. නිරතුරුවම ඔබ ඉදිරියේ ලොව්තුරා
බුදුරජාණන් වහන්සේ වැඩසිටින බව, සැරියුත් මුගලන් මහෝත්තමයන් ඔබ ඉදිරියේ වැඩ සිටින
බව, ඔබට අවවාද දෙන බව සිතන්න. දකින්න. මේ ගමනේදී ඔබට මෙයට වඩා ආරක්ෂාවක් අවශ්‍ය
නැත. ඔබට හැමෝම කියාවි රැස් කරන්න කියල. මොනවද...? දැනුම, ගාථා, පිරිත්,සුත්‍ර, අභිධර්ම, බණ... මේ සියල්ලේම
අන්තයට නොයා ඔබ සිටින්න. ඔබ සැහැල්ලු වන්න. සෑම බරකින්ම නිදහස් වන්න උත්සාහ ගන්න.
නිවීම කියන්නෙ මෙහෙයුමක්. මේ මෙහෙයුමට අවශ්‍ය වන්නේ තුන් සිවුරත්, පාත්‍රයත්, හුදෙකලා වන කුටියත් පමණයි. ඔබ
ශීලයෙන්, සමාධියෙන් පරිපුරණ බවට පත්ව ඇතැයි ඔබට විශ්වාස නම්, ඔබගේ සීලය ගැන කුකුසක් නොමැතිනම් වනයේ හුදෙකලා
කුටියක් තෝරාගැනීමට ඔබ සුදුස්සෙක්. ඔබගේ ශීලය ගැන ඔබට විශ්වාසයක් නොමැතිනම්, වනසේ
හුදෙකලා වීමට ඉක්මන් නොවිය යුතුය. ඔබ ශක්තිමත් නොවීම මාරයාට ගොදුරකි. එවැන්නකු
වනයේදී, ගල් කුටියේදී අමනුෂ්‍යයන් විසින් වහලෙකු, ලෙඩෙකු,
මානසික රෝගියෙකු කරනු ඇත. ඔබ පසුබට නොවන්න. මග වැඩු කල්‍යාණ මිත්‍රයෙකුට කෙටි
කමටහන් කිහිපයකින් ඔබව ශක්තිමත් කිරීමට හැකියාව ඇත. මෙහිදී සීලය යනු ඔබ සාමනේරද, උපසම්පදාද, මොන නායක ස්වාමින්
වහන්සේගේ ගෝලයකුද යන්න නොව, ඔබ නිවැරදි බවට ඔබ
තුළ ඇති විශ්වාසය පමණි. ලොව්තුරා ධර්මය කෙරෙහිද, ඔබ කෙරෙහිද විශ්වාසය තබන්න. අවශ්‍ය
වේලාවට කල්‍යාණ මිත්‍රකුගෙන්, ගුරුවරයෙකුගෙන් අවශ්‍ය උපදෙස් ලබාගන්න. තමාගේ
ආරක්ෂාවට අවශ්‍ය මොහොතක දී තෙරුවන් වඳින ගාථා තුනක්, කරණීය මෙත්ත සුත්‍රයත්, කඳ පිරිතත් ඔබ අර්ථ සහිතව දැන සිටියහොත් එය
වුවද ප්‍රමාණවත්ය... සියල්ල ඔබ අතහරින්න. අත්හැරීමේ ප්‍රමාණයට ඔබට නිවන් මග වැඩීම
පහසු කරගත හැකිය. අන් සියල්ල අත්හැරීමට දක්ෂවූවේ නම් පමණක් ඔබ නිවන් මෙහෙයුමට
සුදානම්ය. හැබැයි මේ වන විට ඔබ ළඟ පාවිච්චියට මුහුණ බලන කණ්නාඩියක්, උණුවතුර බෝතලයක්, සීතලට පොරෝනයක්... මේ වාගේ දෑ
තිබුණහොත් තවම ඔබ සුදානම් නොමැති බවයි පෙනෙන්නේ. මොකද මේ සියල්ල තුළ තිබෙන්නේ ‘මගේ
කයේ සැප පිලිබඳ චේතනාවයි. සියල්ල අතහරින්න. එතෙක් ඔබ සුදානම් නැත. මුහුණ බලන
කන්නාඩිය අතහැරීමට නොහැකි කෙනෙකුට, කය අතහරින්න යයි කීම විහිළුවකි. අනිවාර්යයෙන්ම
ඔබට හැකිය. ඔබ නැවත නැවත බුදු සමිදුන්ව හිතෙන් මවාගන්න. ඔබේ හදවතට වඩම්මවා ගන්න්න.
නිරතුරුවම ඔබ උන්වහන්සේගේ සෙවනෙහි සිටින බව දකින්න. ඔබ හිමිදිරියේ පිණ්ඩපාතය වඩිනා
විට ඔබ ඉදිරියෙන් බුදු සමිඳුන් වඩිනා බව දකින්න. සැරියුත්, මුගලන්, ආනන්ද මහෝත්තමයන්
වහන්සේලා සිතින් මවාගෙන ඒ උතුමන් සමග සිතින් ජීවත් වන්න. උන්වහන්සේලා සමග සිතින්
සාකච්ඡාවේ යෙදෙන්න. උන්වහන්සේලාගේ ජීවිතයේ ඇවතුම් පැවතුම් ඔබේ ජීවිතයට එකතු කර
ගන්න. උන්වහන්සේලා නිවන් මග අවබෝධ කර ගැනීම පිණිස ගත වෙර වීරිය මනසින් දකින්න.
චක්කුපාල මහරහතන් වහන්සේගේ උත්සාහය සිතින් මවා ගන්න.
ඉහත උපක්‍රම භාවිතා කර ඔබ නිවන් මගට සිත පුරුදු
පුහුණු කරන්න. මාර බැමි එකිනෙක කඩා දමමින්ද, අත්හළ යුතු දේවල් අත්හරිමින්ද ඔබ
සුදානම් වන්න. හැබැයි ඔබ ලෝකය ඉදිරියේ මහරහතන් වහන්සේ කෙනෙක් ලෙස හැසිරෙන්න එපා.
එවිට ඔබ වැටෙන්නේ මාරයාගේ මල්ලටය. ඔබ ලෝකය ඉදිරියේ එසේ හැසිරෙන්නට ගියහොත් නිවන්
මග ගබ්සා වෙනවාමය. එවිට ඔබ නිවීම කරා නොව, මානසික රෝහලකට යා හැකිය. හොඳින් මතක තබා
ගන්න, ඔබ දක්ෂ නම් භාවනාව නිවන් මග කරාද, අදක්ෂ නම් භාවනාව ඔබ මානසික රෝගියෙකු
බවටද පත්කරනු ඇත. මෙවැනි අසරණ උද්යෝගිමත් පින්වත් චරිත අනන්තවත් අපට හමුවී ඇත.
අර්ථවත්ව මග වැඩු ගුරුවරයකුගේ මාර්ගෝපදේශනය නොලැබීම මෙම විනාශයට හේතුවේ. තමා තුළ
ඇති මාන්නයද, මාර්ගඵල උන්මාදයද, ඉලක්කය කරා යෑමට ඇති හදිස්සියද, ගිහිපින්වතුන්ගෙන් ලැබෙන වැඩි ප්‍රතිචාරද ඔබට
මර උගුලක් වනවා ඇත. පිං පව්, කුසල් අකුසල්, රුචි අරුචි ආදිය ගැන ඇති කැමැත්ත අත් හරින්න.
මේවයේ අනිත්‍ය බව දකින්න. ඔබ නිවන් මෙහෙයුමට සුදානම් වන්න. මේ වනවිට ඔබගේ කුටියේ
තිබිය යුත්තේ තුන් සිවුරත්, පාත්‍රයත්, කය පිරිසිඳු කිරීමට අවශ්‍ය අවම දෙයකුත් පමණකි.
ඔබ නැවත කුටිය දෙස බලන්න. එහි පැරසිටමෝල් පෙත්තක් තිබුණද එයත් ඔබ අයින් කළ යුතුය.
ඔබ එය තබා ගන්නේ කය සුවපත් කිරීම සඳහාය. දැන් ඔබ සුදානම් වන්නේ කය අත්හැරීමේ
මෙහෙයුමටය. වේදනාව සමනය කිරීමට උත්සහ ගන්න එපා. වේදනාව අනිත්‍ය බව, එහි ස්වභාවය, වේදනාව තමන්ට අයත් දෙයක් නොවන බව
දකින්න උත්සහ ගන්න. ඔබේ ශරීරයේ යම් වේදනාවක් දැනේ නම් හිමිදිරියට ස්වමුත්‍රා උගුරු
දෙකක් වළඳන්න. මුත්‍රා වල මුල් කොටසද, අග කොටසද අතහැර මැද කොටස පාවිච්චිය සඳහා
ගන්න. උගුරු දෙකකට වඩා නොගන්න. මන්ද ශරීරයේ ඇසිඩ් ගතිය වැඩිවී දාහය වැඩිවන හෙයිනි.
මෙම ඖෂධය ඔබගේ කායික වේදනාව අවම කරාවි. මෙම ස්වමුත්‍රා උගුරු දෙක ඔබ ඊයේ රාත්‍රියේ
වැළඳු පැන් බව මෙනෙහි කරන්න. මාරයාට හීන් නුලෙන් පහර දෙන්න. ඔබ ස්වභාව ධර්මයේ
කොටසක් වන්න. ස්වභාව ධර්මයත්, ඔබත් දෙකක් නොව එකක් බවට පරිවර්තනය කරගැනීමට දක්ෂ
වන්න. ඔබ ඉදිරියේ තිබෙන රූස්ස ගසත්, ඔබේ කයත් සංසන්දනය කර බලන්න. දෙකම ධාතූන්ගේ
විවිධත්වය පමණක් බව දකින්න.
0 comments:
Post a Comment