2 - ගිහිවත

මහ රහතුන් වැඩි මග ඔස්සේ - අතහැරීම පොත 1

            පැවිදිව නිවන් මග වැඩීමට බලාපොරොත්තු වන ඔබ ගිහිව සිටිනා කාලයෙදී ගිහිවත සම්පූරණ කිරීම පැවිදිව නිවන් මග වැඩීමට පහසුය. ඔබ ගිහිව සම්පූරණ කර නොමැතිනම් නිවීමේ අරමුණ සඳහා පැවිදි වීමට හදිසි නොවන්න. ගිහිවතේ තිඹිරිගෙය ගමේ පන්සලය. පන්සලේ ස්වාමීන් වහන්සේලාගේ ස්වභාවය විවධ වුවද ඒවා ඔබට අදාළ නොවන බව සිතන්න. අනිත්‍යභාවය නිසා විවිධත්වය ඇතිවීම ස්වභාවිකය. අප පුදුම විය යුත්තේ එසේ නොවුණහොත්ය. අනුන්ගේ වැරදි ඔබ අතහරින්න. ඔබේ අරමුණ කරා යන්න. පන්සලේදී හැමෝගේම සේවකයා, දාසයා ඔබ වන්න. නිදහසේ අන් අයට වඳින්න පුදන්න, සිල් පිරිසට සිව්පසය සපයන්න ඔබ මැදිහත් වන්න. අනුන්ගේ පැමිණීම, දායකත්වය ඔබ නොසොයන්න. ඔබේ අරමුණ උදෙසා වෙහෙසී සියල්ල කරන්න. හැමගේ සිත් තුළ ඇතිවන කරුණාවෙන්, මෙත් සිතින් ඔබ ඔබේ ආධ්‍යාත්ම ශක්තිය ලෝකයට හොරා වැඩි දියුණු කරගන්න. ඔබ සිදු කරන සෑම ක්‍රියාවකම අනිත්‍ය දකින්න. ඔබ මැදිහත්ව කළද එහි මුල් තැන අන් අයට දෙන්න. අත්හැරීම පුරුදු කරන්න. සැවොම සතුටු කර ඒ පිනෙන් ඔබ ශක්තිමත් වන්න. දායකයින් උදෙසා බෝධි පූජා , පෙරහැර, ධානමාන, කඨීන පිංකම් සංවිධානය කොට ඔබ ඒවායේ අවසානයද අනිත්‍ය බව දකිමින් ආධ්‍යාත්මික වශයෙන් ශක්තිමත් වන්න. අනුන්ගේ කුස පුරවා ඔබ නිරාහාරව සිටින්න. ඒ බව අන් අයට නොඅඟවන්න. වයෝවෘධ ස්වාමින් වහන්සේලා සිටී නම් උන්වහන්සේලාට උපස්ථාන කර උන්වහන්සේලාගේ ආශිර්වාදයෙන් ඔබ ශක්තිමත් වන්න. සමාජ සේවයට කැපවී අනුන් සතුටු කොට අනුන්ට සේවය කොට ඔවුන්ගේ ආශිර්වාදයෙන් ඔබ ශක්තිමති වන්න. ලාබය, කීර්තිය, ප්‍රධානත්වය නොව තම ඉලක්කය නිවන් මගය කියා අරමුණ සිහි කරන්න. ලෝකයේ කොතෙක් මහන්සිවී වැඩ කළද පොඩ්ඩ වැරදුණු තැන ලැබෙන්නේ ගල් මුල්, දොස් පරොස් බව දකින්න. විවේචන, අසත්පුරුෂකම්, නොසලකාහැරීම්, ලෝකයේ ස්වභාවය බව දකින්න. අප පුදුම විය යුත්තේ ඒවා නොමැතිනම් බව සිතන්න. අනුන්ට සේවය කරමින්, අනුන්ව සතුටු කරමින්, ගුණාගුණ අසමින් අනිත්‍යම දකින්න. ලෝකයේ ස්වභාවය මෙනෙහි කරමින්, ලෝකයෙන් ගත හැකි සියල්ලෙන් ඔබ ඔබේ ආධ්‍යාත්මය සංවර්ධනය කරගන්න.

        රෝගීන්ට උපස්ථාන කිරීමට මැලි නොවන්න. රෝගියෙක් යනු දේවදුතයෙක් බව දකින්න. රෝගියාගේ කයේ ස්වභාවය, ඔහු විඳින වේදනාවේ ස්වභාවය හා රෝගයේ ස්වභාවය ඔබටද පොදු බව සිතන්න. ඔබේ ස්වභාවයද එයම බව දකින්න. ඔහුට උපස්ථාන කර ඔහුගේ ආශිර්වාදයෙන් ශක්තිමත් වන්න. ඔබ මාස දෙක තුනකට වරක් මහා රෝහලට, ළමා රෝහළට, පිළිකා රෝහළට ලෙඩුන් බලන මුවාවෙන් යන්න. අසාධ්‍ය රෝගීන් සිටින වාට්ටුවල ඇවිදින්න... ඔබ රෝගීන්ගේ දුක් බෙදා ගැනීමට නොයන්න. වේදන්නවෙන් ලතෝනි දෙමින් ඔබට ඇසෙන හඬ ඔබේම බව අවබෝධ කරගන්න. පිළිකා රෝහලේ හිසකෙස් ගැලවීගිය, පියයුරු ඉවත්කළ රෝගී පිංවතුන්ව ඔබ කමටහනක් කර ගන්න. හින්දි සිනමාවේ සුරූපී නිළියටද, නළුවාටද මේ ස්වභාවය පොදු බව දකින්න. ඔබේ සිතට නිතර රාගී සිත් ඇතිවේනම් ඔබ කාන්තා රෝහලක ගැබිණි වාට්ටුවවලට ලෙඩුන් බලන වෙලාවට යන්න. දරු ප්‍රසූතියට සුදානම්වූ සහෝදර මව්වරුන්ගේ වේදනාත්මක හැසිරීම් රටා, ඒ අයගෙ ස්වභාවය මනුෂ්‍යත්වයෙන්, සහෝදරත්වයෙන් දකින්න. එය ඔබගේ රාග සිත මැඩපවත්වනු ඇත.

        පාරිභෝගික විසිතුරු ලෝකය ඔබව මුලා කරන, රස නහර පිනායන පාරිභෝගික දෑ පිරීගත් සුපිරි වෙළඳ සංකීරණවල සෑම ආහාරයක්ම මේ කය පෝෂණය කිරීම සඳහාය යන්න දකින්න. එහිම රාක්කයක ඇති විසිතුරු දවටනයක බහාලූ සනීපාරක්ෂක තුවා ඇත්තේ කුමක් සඳහාදැයි නුවණින් දකින්න. මලු පුරවා කරත්තය තල්ලු කොට උජාරුවට බඩු ගෙනගියද අප සැවොම පෝෂණය කරන්නේ අපවිත්‍ර සිරුරක් බව දකින්න. සෑම දෙයක්ම කමටහනක් කර ගැනීමට ඔබ දක්ෂ වන්න. ඔබ බසයක යනවානම් ඔබ වාඩිගත් අසුන ඕනෑම අයෙක් වෙනුවන් දීමට මැලි නොවන්න. අවශ්‍ය මොහොතේ එය පරිත්‍යාග කරන්න. තව යෑමට ඇති දුර ගැන නොසිතන්න. ඔබේ සපපහසුව අන් අගේ උවමනාවන් උදෙසා කැප කරන්න. අන් අය අවඥාවෙන් සිනාසුනද එය නොතකන්න. සේවය ලැබුණු කෙනාගේ ආශිර්වාදයෙන් ඔබ ශක්තිමත් වන්න. ඔබේ නිවන් මග උදෙසා ලෝකයාගෙන් ගතහැකි ශක්තිය ඔබ උපක්‍රමශීලීව නිදහසේ ලබාගන්න. අන් අය ආමිසහි යොදවමින් ඔබ ප්‍රතිපත්තිය වඩන්න. ලෝකයෙන් එතෙරවීමට මග හදාගන්න. සියල්ල අතහැර සියල්ලක්ම කමටහනක් කොටගෙන ඔබ ලෝකයෙන් එතෙර වන්න.

        ඔබ ලෝයෙන් සුවසේ එතෙරවීමට දක්ෂ වුවහොත්, ලෝකයාගේම යහපත උදෙසා, ලෝකයාගේම පරමාර්ථය ඔබට නිවන් මග පෙන්විය හැකිය. එම පරමාර්ථය උදෙසා වර්තමානයේ ඔබ ආත්මාර්ථකාමී වන්න. ඉහත ක්‍රියාකාරකම් තුලින් ඔබ ලබන සතුට ආරක්ෂක දෙවියන්ටද අනුමෝදනා කරන්න. ඔබ යන එන ගමනේදී බාධක මග හැර ආරක්ෂාව ලබා සලසා ගැනීමට, නොපෙනෙන බලවේගද සතුටුකොට ඒ අයගේ ආශීර්වාදයෙන්ද ශක්තිමත් වන්න. අත්හළ යුතු දේවල් අත්හැරීමට උත්සාහ ගන්න. අත්නොහළ දේවල් අත්හැරීමට අවශ්‍ය කාලය පැමිණෙන තෙක් ඉවසිලිමත් වන්න. ඉක්මන් නොවී සිටින්න වගබලා ගන්න. ඔබ හැම විටම ඔබේ සිතේ අවිචාරවත් බව විචාරයට ලක්කරන්න. සිත විමසන්න. ඔබේ සිතට ඉහලින් ඇති ප්‍රඥාවේ ඇසින් නිරතුරුවම සිත සමග පිළිසඳරේ යෙදෙන්න. ඇතිවෙමින් නැතිවන සිත ප්‍රඥාවේ ග්‍රහණයට ගැනීමට සියුම් ලෙස පුහුණු කරන්න.

ඔබ තවම ගිහි පින්වතෙකි. ඔබේ ඉන්ද්‍රියන් කැමති හැම දෙයක්ම අත්දැකීමෙන් විඳ, රසබලා එහි අනිත්‍ය දකින්න. ඔබට ඒ නිදහස තවම ඇත. අත් නොවිඳ, අත්නොදැක අනිත්‍ය දකින්නට යෑමෙන් ඔබට ඉදිරියේදී ප්‍රශ්න මතුවීමට හේතුවිය හැකිය. ඔබ වැඩියෙන් ආශා කරන හෝ කැමති කරණා දෙයක් වෙතොත් නැවත නැවත ඒ දෙය රසවිඳ ඒ කැමැත්තෙන් මිදෙන්න. කැමති දෙය අත්දකිමින්, අත්විඳිමින් අවබෝධය ලබමින් අනිත්‍ය දකිමින්, අත්හැරීමට පුරුදුවෙමින් ‘ගිහිවත’ සම්පුර්ණ කොට නිවන් මග වඩන්නට සසුන් කෙතට පිය නගන්න. ගිහි ජීවිතය තුළ ඔබ සිත පමනක් පැවිදි කරන්න. ඔබ පුරුදු කරන්න අවම සම්පත් සමග හුදෙකලාවේ ගත කරන්න. ඔබ පරික්ෂා කර බලන්න. පාවහන් නොදා ඔබට ගල් බොරළු මත ඇවිදින්න හැකිද කියා. ඇඳුම් කට්ටල දෙකකින් ජීවත් වන්නට පුළුවන්ද කියා. ආහාර වේල් දෙකක් ඔබට ප්‍රමාණවත්ද කියා. ඔබ කැමතිම කරන, ආසම කරන රූපයක් ඔබට අත්හරින්නට පුළුවන්ද කියා. ඥාතීන්, ගේ දොර අත්හැර ජීවත් වීමට හැකිද කියා. ඔබ ඉදිරියට එන ඕනෑම අභියෝගයකට ඔබට මුහුණ දීමට ශක්තිය තිබෙනවාද කියා. පිළිතුර ඔව් නම් ඔබ දැන් පැවිද්දට ඔබ දැන් සැබෑම සුදුස්සෙක්. ඉහත අත්දැකීම් ගැලපෙන්නේ ජීවිතයේ තරුණ වයසේ සහ ඉන් ඔබ්බට ගොස් ජීවිතාවබෝධයෙන් මේ ආත්මභාවායේදීම නිවීම උදෙසා වීර්ය වඩන, අධිෂ්ඨාන සහගතව නිවන් මග වැඩීමට පමණක් බව හොඳින් සිහියේ තබා ගන්න. ශාසනය ආරක්ෂා කරගැනීමට, මනුෂ්‍ය, දිව්‍ය, භ්‍රක්ම සුගති ප්‍රාර්ථනා කරන, රට ආගම, ජාතිය ආරක්ෂා කිරීමට බලාපොරොත්තුව පැවිදිවන පින්වතුන්ට ඉහත ප්‍රතිපදාව අවශ්‍ය නොවන බව සලකන්න. එවැනි උතුමන් ආරක්ෂාකර දෙන සම්බුද්ධ ශාසනය ප්‍රයෝජනයට ගනිමින්, දක්ෂයා ලෝකයෙන් එතෙර වීමට දක්ෂ විය යුතුය. ඔබ ලෝකයෙන් එතෙරවීමට දක්ෂ වුවහොත් එය ශාසනය ආරක්ෂා කරන ගෞරවනීය ස්වාමීන් වහන්සේලාටද මහත්ඵල මහානිශංස කුසලයක් වනවා ඒකාන්තය.

LABEL: මහ රහතුන් වැඩි මග ඔස්සේ