මහ රහතුන් වැඩි මග ඔස්සේ - අතහැරීම පොත 1
නියමිත වෙලාවට දායක පිරිස දානය දාන ශාලාවේ මේසය මත තබා ඇත. එළවළු හතරක්, බතක්, පලතුරු, කැවිලි ඊට අයත්ය. දායකයන් ඉවත්ව ගිය පසු ඔබට මෙහෙම හඬක් ඇසෙනු ඇත.
“ සැරට මොකුත් නැහැ. හාල්මැස්සෝ ටිකක් බදිමුද?
”
කප්පිය කුටියේ විනයානුකුලව පාවිච්චි කිරීමට
වියළි ආහාර ඇත.
ඔබ සාමනේර නිසාම හාල්මැස්සන් සුද්ද කිරීම ඔබට
පැවරෙනු ඇත. ඔබ එයට නොගැටෙන්න. මගහැර නොයන්න. අභියෝගයට මුහුණ දෙන්න. සමහර විට ඔබ
මස් මාංශ නොවලඳන කෙනෙක් වෙන්න පුළුවන්. ඒ ගැන නොසිතන්න. ඔබ ඔලුව කඩන හාල්මැස්සා
සංසාරයේ ඔබේ මව, පියා, ඥාතියා, දරුවා ව සිටින්නට ඇතැයි සිතන්න.
මේ හාල්මැස්සා සංසාරයේ සක්විති රජවද, දෙවියෙක්වද, ප්‍රේතයෙක්වද ඉන්නට ඇතැයි ඔබ
දකින්න. ඔබෙම කල්‍යාණ මිත්‍රයාව සිටින්නට ඇතැයිද ඔබ දකින්න. සෑම මනුෂ්‍යයෙකුටම,
සෑම සත්වයෙකුටම මෙය ගලපා බලන්න. මේ හාල්මැස්සා පැවිදිව ඉන්නට ඇතැයිද සිතන්න.
පැවිදිව සිටියත් නැවත හාල්මැස්සෙක් වුයේ කෙසේද යන්නත්, ඇයිද යන්නත් සිතන්න. මේ හාල්මැස්සා සංසාරයේ තම
කුසින් රහතන් වහන්සේලාද බිහිකොට ඇතැයි සිතන්න ඔබ දක්ෂ වන්න.
ඔබ මේ ලබන මේ අවබෝධය නිසා, හාල්මැස්සාටද ඔබ
හදවතින් පින් දෙන්න. බලන්න ඔබ හාල්මැස්සෙක්ගෙන් ලැබුව කමටහනක ගැඹුර.
හොඳයි, ඔබ ‘ මට
හාල්මැස්සෝ අතගාන්න බැහැ. මම නිර්මාංශයි.’ කියල ගැටුන නම්, ආරණ්‍ය හැර ගියා නම්
ඔබට මේ කමටහන ලැබෙනවාද?
ඔබ දැන් ඉක්මන් වෙන්න අවශ්‍ය නැහැ හාල්මැස්සා
තුළ සත්වයෙක් පුද්ගලයෙක් ඉන්නවාද කියල දකින්න. මුලින්ම ලැබුණ කමටහන ප්‍රයෝජනයට
ගන්න. සංසාරයේ ගැඹුර දකින්න. සංසාරය ගැන බිය ඇතිකර ගන්න. ඒ වැඩීම තුළ ඔබේ ප්‍රඥාව ත්‍රිවර
වන විට ඔබගේ අවබෝධය ලැබේවි. හාල්මැස්සා තුළ සත්වයෙක් පුද්ගලයෙක් නොමැත, එහි ඇත්තේ
අනිත්‍ය භාවයට පත්වන ධාතු කොටස් පමණක් බව. ඔබට මෙලෙස වැටහෙන්නේ නැති නම් ඔබ
ඉවසන්න. ඔබට ප්‍රඥාව වැඩිවන විට මෙම ධර්මතාවය අවබෝධවේවි.
ඔබ මෙවන් අවබෝධයක් ලබමින් පසුවන විට හාල්මැස්සෝ
බැදුම රස බලන අය ලබන්නේ රස තෘෂ්ණාව පමනක බව සිතන්න. වර්තමානයේ ගිහි වුවද, පැවිදි
වුවද ඔහු නැවත සසර හාල්මැස්සෙක් වීමේ ඉඩකඩ එසේම විවෘතව පවතින බව දකින්න ඔබ දක්ෂ
වෙන්න.
සසර නැවත මව් කුසක්, බිත්තරයක් තුලට නොයන්නට ඔබ දක්ෂ වන්න. එසේ
නොවුනහොත් යම් දවසක මෙම හාල්මැස්සාම මිනිසකුව ඉපද, ඔබ හාල්මැස්සෙකුව ඉපද ඒ මිනිසා
විසින් ඔබවද මෙපරිද්දෙන් බැදුමට ගනු ඇත. පෙර භවයක මේ හාල්මැස්සා පැවිදිව කළ ක්‍රියාව
වර්තමානයේදී ඔබ නොකරන්න. ඔබ නිර්මාංශයැයි උදම් ඇනීමෙන්, ඔහු මාංශයැයි පිළිකුල්
කිරීමෙන්, දිව ඉල්ලන ඉල්ලන රස දීමෙන් රැස්වන්නේ තණ්හාවයි. ඔබ කළ යුත්තේ රස ඉල්ලා
ඇතිවූ සිත අනිත්‍ය බව දැකීම පමණක්ය.
0 comments:
Post a Comment