චේතනාව - රජයේ මුද්‍රණාලය

රජයේ මුද්‍රණාලයීය බෞද්ධ සංගමය - රජයේ මුද්‍රණාලය කොළඹ 08

ධම්මො හවෙ රක්ඛති ධම්මචාරී

මාසික ධර්ම ප්‍රකාශනය - අංක 270 

බු. ව. 2562 වූ දුරුතු පුර පසළොස්වක පොහෝදා                       

 “චෙන්තනාහං භික්ඛවේ කම්මං වදාමි චේතයිත්වා කම්මං කරෝති කායෙන වාචාය මනසා........”

 පින්වතුනි,

අද දුරුතු මස පුර පසළොස්වක පොහෝ දිනයයි. සකළ ලෝකවාසීන්ටම මෙම උතුම් පොහෝ දිනය කරුණු කිහිපයක් නිසාම වැදගත් වෙනවා. සම්මා සම්බුදු පදවි ලබා නව මසක් ගිය තැන තිලෝගුරු බුදුරජාණන් වහන්සේ අද වැනි පොහෝ දිනක  උරුවෙල් දනව්වේ වාසය කළ උරුවේල් කාශ්‍යප, නදී කාශ්‍යප, ගයා කාශ්‍යප යන තුන් බෑ ජටිලයින් ප්‍රමුඛ දහසකට අධික පිරිසක් දමනය කළ බව සඳහන් වේ. පළමුව උරුවේල් කාශ්‍යප දමනය කළ අතර ඔහු දමනය කිරීම සඳහා පෙළහර පෑ බව ද සඳහන් ය. ගින්න උපමා කරමින් ආදිත්ත පරියාය සුත්‍රය දේශනා කර ඇත. දේශනා අවසානයේ සම්බුදු සව්වන් වශයෙන් සසරින් නිවී ගියේ ය.

බුදුරදුන්ගේ ප්‍රථම ලංකාගමනය ද දුරුතු පොහොය දිනයේ ම සිදුවීම නිසා ලක්වැසි අපට ද අතිශය වැදගත් පොහෝ දිනයක් ලෙස සඳහන් කළ හැකිය. සවනක් ඝන බුදු රැස්මාලාවන් සමලංකෘතව මහියංගන පූදබිමට වැඩම කළ උන්වහන්සේ දුටු ලක්වැසි යක්ෂ සේනාව විශ්මයට පත්වූ බවද ප්‍රාතිහාර්ය පෑමත් සමග බුදුරදුන් කෙරෙහි ගෞරවය දක්වන්නට ඇතැයිද සිතිය හැකිය.  සම්බුද්ධ දේශනාවන් ශ්‍රවණය කළ සමන්තකූට පර්වතවාසී සුමන සමන් දෙවියන් අතිශය සතුටට පත්ව වැඳුම් පිදුම් කිරීමට වස්තුවක් බුදුරදුන්ගෙන් ඉල්ලා ඇත. එවිට බුදුරදුන් හිස පිරිමැද කේශ ධාතු සවල්පයක් ලබා දී ඇති අතර ඒවා නිදන් කොට සත්රියන් දාගැබක් නිර්මාණය කරන ලදී. සුමන සමන් දෙවියන් සෝවාන් භාවයට පත් වූ බව සඳහන් වේ.

කැළණි විහාරස්ථානයේ වාර්ෂිකව සිදු කරනු ලබන අලංකාර දුරුතු පෙරහැර ද ලක්වැසි සැමට වැදගත් ය. දෙස් විදෙස් බොහෝ දෙනාගේ ප්‍රසාදය දිනාගත් අලංකාර සංස්කෘතික මංගල්‍යයක් ලෙසට ද සඳහන් කළ හැකි ය. ඉහතින් මා සඳහන් කළේ දුරුතු පොහෝ දිනයේ වටිනාකමයි.

කාරුණික පින්වතුනි, මාගේ මාතෘකාවට අනුව “මහණෙනි, මම චේතනාව කර්මය යැයි කියමි. සිතින් සිතා කයෙන්, වචනයෙන්, මනසින් කර්ම රැස් කරයි” යනු බුදු වදනයි. බුදු දහමට අනුව කර්මය යනු ක්‍රියාවයි. සචේතනික ක්‍රියාවන් බව ද සිහියේ තබාගත යුතුයි. මිනිසුන් සිතාමතා හොඳ දේ යහපත් දේ මෙන්ම නරක දේ ද කරති. නරක ක්‍රියා නරක ප්‍රතිඵල ලබාදෙන අතර හොඳ ක්‍රියා හොඳ ප්‍රතිඵල ලබා දේ. තවත් ලෙසකට පැවසුවහොත් මරණින් මතු දුගතිගාමී වීම ද සුගතිගාමී වීම ද කරනු ලබන ක්‍රියා අනුව සිදු වේ. බුදු දහමේ හොඳ ක්‍රියා පින, කුසලය යන වචනවලින් හඳුන්වයි. නරක ක්‍රියා පව, අකුසලය ලෙසට හඳුන්වයි.

මිනිසුන් වශයෙන් ඔබ අප සෑම දෙනාම තිදොරින් කර්ම රැස් කරනු ලැබේ. තිදොර නම් සිත, කය, වචනයයි. දුක් විපාක දෙන කර්ම මෙන්ම සැප විපාක දෙනු ලබන කර්ම ඇත. එබඳු වූ සැප දුක් විපාක කර්මයන් තුලින් උපදින බැවින් නැවත නැවත ඉපදීමද ඇතිවේ. එනිසා සුගතියක හෝ දුගතියක නැවතත් ඉපදීමට සිදු වේ. එය කර්මානුරූපව සිදුවන ක්‍රියාවලියකි. ඒ හොඳ නරක ක්‍රියාවන්ට අනුරූපිවය. එලෙස නැවතත් ඉපදෙමින් මියැදෙමින් සිටියි. එය චක්‍රයක් බඳු ය. සංසාර චක්‍රය ලෙසට හඳුන්වන්නේ ද මේ ක්‍රියාවලියයි. රැස් කරනු ලබන පින්, පව්, කුසල්, අකුසල්වලට කැමති වුවත් අකමැති වුවත් සැපදුක් විපාක විඳීමට සිදුවේ.

ලෝකය තුළ ජීවත්වන පුද්ගලයන් සමාන නොවේ. එකම අම්මාගේ දරුවන් වුවද සමාන නොවේ. ඔවුන්ගේ හැඩරුව ගතිගුණද අසමානය. මෙලෙස සිදුවන්නේ කෙලෙසදැයි කෙනෙකුට ප්‍රශ්නයක් ඇතිවිය හැකි ය. බුදු දහමට අනුව පුද්ගල විශමත්වය ඇති වන්නේ අතීත කර්මවල විපාක අනුව බව සඳහන් කළ හැක. කර්මය කුසල අකුසල කර්ම ලෙසට ද සිතින්, කයෙන් හා වචනයෙන් සිදුවන කුසල හා අකුසල ලෙසට ද බෙදිය හැකිය. කුසලාකුසැල කර්ම නිසා සසර දික්වේ. අපි අරහත් වී සසර ගමන් නිමා කරන තුරුම බියකරු සසරේ ගමන් කරයි. පුබ්බේනිවාසානුස්සති ඥානය හා චුතූපපාත ඥානය ඇති ය සසරේ නියම තතු අත්දැකීමෙන් ම දැන ගනිති. සසර ගමන විමසීම සඳහා දිනක් තොදෙයිය පුත්‍ර සුභ නම් තරුණයා බුදුරදුන් හමුවීම සඳහා ජේතවනාරාමයට පැමිණියේ ය. ඔහුට බුදුරජාණන් වහන්සේ චුල්ල කම්ම විභංග සුත්‍රය දේශනා කළ සේක. එහිදී ඔහු විසින් මෙලොවදී අපට දකින්නට ලැබෙන විෂමතා 14ක් බුදුරදුන්ගෙන් විමසා තිබේ. ඒවා නම් -

01.         අඩු ආයුෂ ඇති සත්ත්වයා                 (අප්පායුකා)

02.         දීර්ඝායුෂ ඇති සත්ත්වයා                  (දීඝායුකා)

03.         ආබාධ බහුල සත්ත්වයා                    (බහු ආබාධා)

04.         අල්ප බහුල සත්ත්වයා                      (අප්පාබාධා)

05.         අවලස්සන (විරූපී) සත්ත්වයා          (දුබ්බවණ්ණා)

06.         ලස්සන (සුරූපී) සත්ත්වයා               (වණ්ණවන්තා)

07.         යසස් නැති සත්ත්වයා                      (අප්පේ සක්ඛෝ)

08.         යසස් ඇති සත්ත්වයා                        (මහේසක්ඛෝ)

09.         භවභෝග අල්ප සත්ත්වයා               (අප්ප භෝගා)

10.         මහත් වූ භවභෝග ඇති සත්ත්වයා   (මහාභෝගා)

11.         පහත් යැයි සම්මත සත්ත්වයා           (නීච කුලීනා)

12.         උසස් යැයි සම්මත සත්ත්වයා           (උච්චා කුලීනා)

13.         නුවණ මද සත්ත්වයා                        (දුප්පඥ්ඥා)

14.         නුවණින් පිරිපුන් සත්ත්වයා             (පඥ්ඥාවතිකා)

මෙම පැනයට පිළිතුරු ලබාදුන් බුදුරදුන් “මානවකය, සත්වයෝ කර්මය ස්වකීය කොට ඇත්තේ ය. කර්මය දායාද කොට ඇත්තේ ය. කර්මය කරණ කොට ඇත්තේ ය. කර්මය නෑදෑ කොට ඇත්තේ ය. කර්මය පිළිසරණ කොට ඇත්තේ ය. කර්මය නිසාම පුද්ගලයාගේ හීන බව හා උසස් බව ඇතිවේ යනුවෙන් දේශනා කළ සේක. එවිට ඔහු එම පිළිතුරින් සෑහීමකට පත් නොවී තවත් විස්තර කර දෙනමෙන් ඉල්ලා සිටියේ ය. එය මෙලෙස දැක්විය හැකිය.

    සිදු කරනු ලබන ක්‍රියාව                                     එයට අනුරූපි ප්‍රතිඵලය

 

සතුන් මරන්නා                                                  - අඩු වයසින් මියදේ

සතුන්ට දයාව කරුණාව දක්වන්නා                  - දීර්ඝායුෂ විඳී

සත්වයන්ට හිංසා කරන්නා                               - බොහෝ රෝගාබාධවලට හිමිකම් කියයි

සත්ව හිංසනය පිටු දකින්නා                             - නිරෝගීව උපදී

තරහවෙන් කටයුතු කරන්නා                           - දුර්වර්ණව (විරූපිව) උපදී

තරහ නොගෙන කටයුතු කරන්නා                   - වර්ණවත්ව (සුරූපිව) උපදී

අනුන්ගේ සැපත දැක සතුටු නොවන්නා          - යසස් නැතිව උපදී

අනුන්ගේ සැපත දැක සතුටු වෙන්නා               - යසස් ඇතිව උපදී

දන් නොදෙන්නා                                              - දුප්පත්ව (අල්පභෝගී) උපදී

දන් දෙන්නා                                                      - පොහොසත්ව (මහාභෝගී) උපදී

මානයෙන්, අනුනට ගරුසරු නොදක්වන්නා   - පහත් යැයි සම්මත කුලවල උපදී

අනුනට ගරුසරු දක්වන්නා                              - උසස් යැයි සම්මත කුලවල උපදී

ධර්මය විමසුම් නොකරන්නා                           - ප්‍රඥාව අඩුව උපදී

ධර්මයට ගරු කරමින් විමසන්නා                     - ප්‍රඥාව ඇතිව උපදී

දේශනාව අවසානයේ දී ඔහු අතිශය සතුටට පත්ව ඇත. අප ද ජීවිතය සාර්ථකව ගත කිරීම සඳහා මෙම ඉගැන්වීම සාර්ථකව භාවිතා කළ යුතු ය. අඩු පාඩු සකසාගත යුතු ය. පෙර අප සිදු කරනු ලැබූ කර්මයන් නිසා විඳීමට ඇති සැප දුක් විපාක තේරුම් ගත යුතු ය. යහපත අයහපත හඳුනාගෙන කළයුත්ත නොකළයුත්ත දැන හැඳින ජීවත් වීම වැදගත් වේ. එය දෙලොව ජීවිතය පමණක් නොව සසර යහපත පිණිස ද හේතු වන බව දැනගත යුතු ය. මේ පොහෝ දින කරනු ලබන උතුම් දන් පින් බලයෙන් සැමට ම යහපත වේවා ! නිවන් ලැබේවා !

සැමට තෙරුවන් සරණයි !

 

මෙම දහම් පත්‍රිකාව සම්පාදනය කළේ මරඳගහමුල            

වාලුකාරාම විහාරවාසී වලස්මුල්ලේ ධම්මවිමල හිමි වේ.

 

ශ්‍රී ලංකා රජයේ මුද්‍රණ දෙපාර්තමේන්තුවේ මුද්‍රණය කරන ලදී.

LABEL: දහම් පත්‍රිකා